Sari front

Sari, Isang Dagling Novella | Eve P. Antonio at Gerome Nicolas Dela Peña

₱390.00

Description

“Paano nga ba mabuhay nang matino sa bulok na sistema? Pinakita ng Sarì na posible. Pero ’di mo ’yan makikita kung palagi ka lang nasa loob ng classroom o nakatago sa comfort ng syllabus. Kailangan lumabas, maputikan, mapagod, masaktan. Ang sarap palang malaman na hindi ka nag-iisa, na may mga taong kagaya mo, naguguluhan din pero patuloy pa rin.”
NORMAN WILWAYCO Kuwentista at Awtor, Migrantik

“Isang hamon at inobasyon ang makapag-akda ng novella na binuo ng mga kabanatang nasa pormang dagli. Buo ang bawat kabanata sa kanyang pagbabahagi ng pira-pirasong salaysay na may kasarinlan bilang dagli. At kung susumahin ang lahat ng kabanatang ito ay nakabigkis ito bilang mas malawak na naratibo na may pakikipagsapalarang batay sa punto de bista at daglimga kamakailang pangyayari. Babasahing nasa nakagisnang porma bagaman umaangkop sa mabilis at limitadong sandaling maigugugol sa napakalawak na mapagpipiliang mga materyal sa midya, internet, makabagong panitikan, at mga masalimuot na usaping panlipunan.

Isa itong pas-de-deux kapuwa sa pag-aakda ng novella at pasalit-salit na salaysay ng mga pangunahing tauhan. Kaya’t malinaw ang interseksyon at talaban ng mga tinig, punto de bista, iba pang tauhang nabanggit o nasangkot, at iba pang komplikasyon sa lipunan at politika. Lalatayan ng akdang ito ang sinumang may malasakit pa sa bayan. Itinaas nina Antonio at Dela Peña ang antas ng pormang dagli, kaya’t maaasahan pa natin ang pormang nobelang may mga kumpol ng dagli kada kabanata na sakop ang mas malayong ibayo sa panibagong pagkakataon ng kanilang tambalan.”
DR. ERNESTO V. CARANDANG Manunulat at Full Professor DLSU Department of Literature

Itong Sari: Isang Dagling Novella ang librong kapag sinimulan mo nang basahin ay kay hirap nang bitiwan at ilapag. Kay hirap bitiwan at ilapag hindi dahil pakikiligin ang mambabasa, kikilitiin ang imahinasyon, dadalhin sa mundo ng pantasya, aaliwin, at ipaghehele ng mga salita kundi dahil yumayanig sa utak. Nanggigising at nagpapakilos.

Madalas nating nakikita ang daglat na POV sa social media. Sa novella, kakaibang POV nina Luna at Marcus ang inihain sa atin nina Antonio at Dela Peña. Sari-saring POV itong humahamon sa mambabasang pasukin ang mundo ng mga tauhan at maging kaisa nila, maging sila, makinig sa kanilang mga kuwento, at samahan sila hanggang sa wakas ng novella.

Bawat kabanata ay nagmumulat. Walang dapat makaranas ng mga naranasan ng mga batang Aeta. Hindi dapat sapitin ng sinumang anak ang sinapit ni Bethany. Hindi dapat mangyari sa sinuman ang nangyari kay Ka Ruben. Sa sibilisadong panahong ito, wala na dapat umiiral na Lipar at Kiko sa ating lipunan. Hinahamon tayo ng nobela na lahat tayo, sa ating simpleng paraan at makakaya, ay dapat sikaping maging Rene Bonifacio, Luna, at Marcus.

Mahigpit kong inirerekomenda ang Sari sa lahat ng mambabasa ng panitikan. Ito ang isang tiyak na aasahan natin sa libro. Hindi ito nangangako ng gusto nating mabasa. Nangangako ito ng higit pa sa gusto at dapat nating mabasa.
DR. LHAI R. TAYLAN Assistant Professor, DLSU Departamento ng Filipino Awardee, KWF Gawad Dangal ng Wika

Additional information

Weight 0.25 g
Dimensions 10 × 2 × 20 cm

Reviews

There are no reviews yet.

Only logged in customers who have purchased this product may leave a review.

error: Content is protected !!