Lain-Laing Lahi Nga Labstori | Eric S.B. Libre | Bisaya

Description

Si Eric Libre usa ka hagtik nga manunulat sa pinulongang Binisaya. Ang iyang mga sugilanon miukiot sa tawhanong mga kasinatian kansang mga karakter tataw nga nakighinabi ngadtos mga magbabasa. Mat-an ang maong tagsulat, tungod kay iyang nakita ang gagmayng tunokong hikot nga mibugkos sa tawo diha sa iyang kaugalingong pakigtigi sa kinabuhi sulod sa yanong katilingban. Kung unsang paagiha, nga kining mga bugkosa mabadbad, walay nasayod gawas sa pagpaminaw sa mga hunghong ug mensahe niining mga sugilanona. Pagbantay. Dunay hugot nga mga kamatuoran sa sugilanon nga magbilin og uwat sa imong kasingkasing hangtod mahimo kining gawasnon. Kining bag-ong pungpong sa mga sugilanon niining libro nga Lain-laing Lahi nga Labstori angay nga pasidunggan diha sa lunhawng kontemporaryong katitikang Mindanawon.

– JOVANIE B. GARAY, Premyadong Magbabalak-Piksiyonista/Instruktor sa English ug Literatures in Mindanao, Probinsiya sa Davao Oriental

Angay natung saulogon nga duna na say obra si Eric S.B. Libre nga makalingaw niadtong mga ganahan mobasa og mga labstori, o kung sa ato pa, mga sugilanon sa gugma. Kining maong libro gilangkoban sa 20 ka estorya ug sa mga titulo pa lang – gikan sa “Paglingkawas” ug “Kasagingan,” ngadto sa “Pamingwit” ug “Paghunas sa Dagat” – maagni na ang magbabasa nga subayon kining maong mga sugilanon. Hapsay ang pagsaysay sa magsusulat sa dagan sa estorya; dali ra sang basahon ang mga pulong nga iyang gigamit kay takdo sa adlaw-adlaw natong pag-estoryahanay. Pinaagi aning maong obra, nagpadayon ang kadasig sa magsusulat nga buhion gayod ang tradisyon sa literaturang Bisaya!

– Bro. Karl Gaspar, CSsR, Premyadong magsusulat nga Mindanawon